ଭୁବନେଶ୍ୱର: ବିଶ୍ୱର ସର୍ବାଧିକ ଜନସଂଖ୍ୟା ଥିବା ଦେଶ ଭାରତରେ ଜନ୍ମହାର ହ୍ରାସ ପାଉଥିବା ପ୍ରସଙ୍ଗ ଏବେ ବିଶ୍ୱସ୍ତରରେ ଆଲୋଚନାର ବିଷୟ ପାଲଟିଛି । ସୋସିଆଲ୍ ମିଡିଆ ପ୍ଲାଟଫର୍ମ ‘X’ (ପୂର୍ବତନ ଟ୍ୱିଟର)ରେ ଏକ ଭାଇରାଲ୍ ପୋଷ୍ଟରେ ଦାବି କରାଯାଇଥିଲା ଯେ ଭାରତର ମୋଟ ପ୍ରଜନନ ହାର (Total Fertility Rate - TFR) ଗତ ଦଶ ବର୍ଷ ମଧ୍ୟରେ ୨.୩ରୁ ୧.୯କୁ ଖସିଆସିଛି, ଯାହା ରିପ୍ଲେସମେଣ୍ଟ ଲେଭେଲ୍ଠାରୁ କମ୍ ।
‘ରିପ୍ଲେସମେଣ୍ଟ ଲେଭେଲ୍’ ତଳକୁ ଖସିଲା ଫର୍ଟିଲିଟି ରେଟ୍
ଏହି ପୋଷ୍ଟକୁ ନେଇ ବିଶ୍ୱର ଧନୀ ବ୍ୟକ୍ତି ଏବଂ ଟେକ୍ନୋଲୋଜି ଉଦ୍ୟୋଗପତି ଏଲନ୍ ମସ୍କ ନିଜ ପ୍ରତିକ୍ରିୟା ଦେଇଛନ୍ତି । ସେ ଲେଖିଛନ୍ତି, “ଭାରତର ଜନ୍ମହାର ଏବେ ରିପ୍ଲେସମେଣ୍ଟ ସ୍ତରଠାରୁ ତଳକୁ ଖସିଛି । ଦେଶର ସର୍ବାଧିକ ଶିକ୍ଷିତ ଲୋକଙ୍କ ମଧ୍ୟରେ ଏହା ଅନେକ ବର୍ଷ ପୂର୍ବରୁ ହିଁ ଘଟିଥିଲା ।”
‘America First’ ନାମକ ଏକ ଆକାଉଣ୍ଟରୁ ସେୟାର ହୋଇଥିବା ଏହି ପୋଷ୍ଟକୁ ପ୍ରାୟ ୧.୩ କୋଟିରୁ ଅଧିକ ଲୋକ ଦେଖିସାରିଛନ୍ତି । ପୋଷ୍ଟରେ ଆହୁରି ଦାବି କରାଯାଇଛି ଯେ ଦିଲ୍ଲୀର ପ୍ରଜନନ ହାର ମାତ୍ର ୧.୨ ରହିଛି, ଯାହା ଫିନଲ୍ୟାଣ୍ଡ ପରି ଦେଶଠାରୁ ମଧ୍ୟ କମ୍ ।
ଏଲନ୍ ମସ୍କ ଗତ କିଛି ବର୍ଷ ଧରି ବିଭିନ୍ନ ଦେଶରେ ହ୍ରାସ ପାଉଥିବା ଜନ୍ମହାରକୁ ନେଇ ସତର୍କ କରିଆସୁଛନ୍ତି । ତାଙ୍କ ମତରେ, ଦୀର୍ଘକାଳୀନ ଭାବେ ଜନ୍ମହାର ହ୍ରାସ ପାଇଲେ ଏହା ଅର୍ଥନୀତି, ଶ୍ରମଶକ୍ତି ଓ ସାମାଜିକ ଗଠନ ଉପରେ ଗଭୀର ପ୍ରଭାବ ପକାଇପାରେ ।
ବିଶେଷଜ୍ଞମାନଙ୍କ ମତରେ, ଶିକ୍ଷାର ପ୍ରସାର, ସହରୀକରଣ, ମହିଳାଙ୍କ କାର୍ଯ୍ୟକ୍ଷେତ୍ରରେ ବୃଦ୍ଧି ଓ ପରିବାର ଯୋଜନା ସଚେତନତା ବଢ଼ିବା ଫଳରେ ଭାରତରେ ପ୍ରଜନନ ହାର ଧୀରେ ଧୀରେ କମୁଛି । ତେବେ ଏହା ଦେଶର ଭବିଷ୍ୟତ ଜନସଂଖ୍ୟା ଗଠନ ଉପରେ କିପରି ପ୍ରଭାବ ପକାଇବ, ସେନେଇ ଚର୍ଚ୍ଚା ଜୋର ଧରିଛି ।
