ଭୁବନେଶ୍ୱର, ୫ ଅକ୍ଟୋବର; ଦୀର୍ଘ ବ୍ୟବଧାନ ପରେ ଓଡ଼ିଶାର କଲେଜ ଓ ବିଶ୍ୱବିଦ୍ୟାଳୟ ପରିସରରେ ପୁଣିଥରେ ଛାତ୍ର ଗଣତନ୍ତ୍ରର ନିର୍ବାଚନୀ ପ୍ରକ୍ରିୟା ଆରମ୍ଭ ହେବାକୁ ଯାଉଛି। ଉଚ୍ଚଶିକ୍ଷା ବିଭାଗର ୨୦୨୬-୨୭ ଶିକ୍ଷାବର୍ଷ ପାଇଁ ଜାରି ସୂଚନା ଅନୁସାରେ, ରାଜ୍ୟର ସରକାରୀ ବିଶ୍ୱବିଦ୍ୟାଳୟ ଏବଂ ସରକାରୀ ଓ ଅଣ-ସରକାରୀ ଅନୁଦାନପ୍ରାପ୍ତ ଡିଗ୍ରୀ କଲେଜରେ ଛାତ୍ର ସଂସଦ ଓ ଅନ୍ୟ ଛାତ୍ର ସମାଜ/ସଂଘର ନିର୍ବାଚନ ହେବ। ଅକ୍ଟୋବର ୧୫ରେ ମତଦାନ ହେବା ସହ ସେହି ଦିନ ଭୋଟ ଗଣତି ଓ ଫଳାଫଳ ପ୍ରକାଶ କରାଯିବ।
ଅକ୍ଟୋବର ୭ରେ ନିର୍ବାଚନର ଅଧିକୃତ ବିଜ୍ଞପ୍ତି ପ୍ରକାଶ ପାଇବ। ଅକ୍ଟୋବର ୯ ଦିନ ୧୦ଟାରୁ ଦିନ ୧ଟା ପର୍ଯ୍ୟନ୍ତ ନାମାଙ୍କନ ଦାଖଲ ହେବ। ସେହି ଦିନ ଅପରାହ୍ଣ ୨ଟାରୁ ୪ଟା ଯାଏ ନାମାଙ୍କନ ଯାଞ୍ଚ ଏବଂ ସନ୍ଧ୍ୟା ୫ଟାରେ ବୈଧ ପ୍ରାର୍ଥୀ ତାଲିକା ପ୍ରକାଶ ପାଇବ। ଅକ୍ଟୋବର ୧୦ରେ ପ୍ରାର୍ଥୀମାନେ ନାମ ପ୍ରତ୍ୟାହାର କରିପାରିବେ ଏବଂ ସେହିଦିନ ଚୂଡ଼ାନ୍ତ ତାଲିକା ପ୍ରକାଶ ହେବ।
ଅକ୍ଟୋବର ୧୪ରେ ପ୍ରାର୍ଥୀମାନଙ୍କ ‘Why I Stand For’ ବୈଠକ ହେବ। ପରଦିନ ଅର୍ଥାତ୍ ଅକ୍ଟୋବର ୧୫ରେ ସକାଳ ୮ଟାରୁ ଦିନ ୨ଟା ପର୍ଯ୍ୟନ୍ତ ମତଦାନ ଚାଲିବ। ଦିନ ୨ଟାରୁ ଭୋଟ ଗଣତି ଆରମ୍ଭ ହୋଇ ଫଳାଫଳ ପ୍ରକାଶ ପର୍ଯ୍ୟନ୍ତ ଚାଲିବ। ଅକ୍ଟୋବର ୧୬ ଦିନ ୧୧ଟାରେ ଶପଥ ଗ୍ରହଣ କାର୍ଯ୍ୟକ୍ରମ ରହିଛି।
ଏହି ନିର୍ବାଚନର ଆଉ ଏକ ଗୁରୁତ୍ୱପୂର୍ଣ୍ଣ ଦିଗ ହେଉଛି ପ୍ରାର୍ଥୀଙ୍କ ଯୋଗ୍ୟତା ଓ ନିର୍ବାଚନ ଆଚରଣବିଧି। ଉପଲବ୍ଧ ବିଭାଗୀୟ ନିର୍ଦ୍ଦେଶ ଅନୁସାରେ, ତିନି ବର୍ଷିଆ ସ୍ନାତକ ପାଠ୍ୟକ୍ରମର ଛାତ୍ରଛାତ୍ରୀଙ୍କ ବୟସ ୧୭ରୁ ୨୨ ବର୍ଷ ଏବଂ ପିଜି ଛାତ୍ରଛାତ୍ରୀଙ୍କ ସର୍ବାଧିକ ବୟସ ୨୫ ବର୍ଷ ହୋଇପାରିବ। ପ୍ରାର୍ଥୀଙ୍କର ଚଳିତ ଶିକ୍ଷାବର୍ଷରେ ଶିକ୍ଷାଗତ ବକେୟା ନଥିବା ଏବଂ ଅତିକମରେ ୭୫% ଉପସ୍ଥାନ ରହିବା ଆବଶ୍ୟକ।
ନିର୍ବାଚନ ପ୍ରକ୍ରିୟାରେ ରାଜନୈତିକ ଦଳର ପ୍ରତ୍ୟକ୍ଷ ହସ୍ତକ୍ଷେପ ଓ ଦଳୀୟ ଅର୍ଥ ବ୍ୟବହାର ଉପରେ ମଧ୍ୟ ନିୟମ ରହିଛି। ପ୍ରାର୍ଥୀଙ୍କ ନିର୍ବାଚନୀ ଖର୍ଚ୍ଚର ସର୍ବାଧିକ ସୀମା ₹୫,୦୦୦ ରଖାଯାଇଥିବା ରିପୋର୍ଟ ହୋଇଛି। ଏହା ସହ ଜାତି କିମ୍ବା ସାମ୍ପ୍ରଦାୟିକ ଆହ୍ୱାନ, ଅପମାନଜନକ ପ୍ରଚାର ଏବଂ AI ଦ୍ୱାରା ତିଆରି ମିଥ୍ୟା କିମ୍ବା ବିକୃତ କଣ୍ଟେଣ୍ଟ ବ୍ୟବହାର ଉପରେ ନିଷେଧ ରହିଛି।
