ଭୁବନେଶ୍ୱର, ୦୫ ଅଗଷ୍ଟ; ଓଡ଼ିଶାର ପ୍ରାକୃତିକ ଓ ଧାର୍ମିକ ଐତିହ୍ୟର ଅନନ୍ୟ ପରିଚୟ ବହନ କରୁଥିବା ଚିଲିକା ହ୍ରଦ, ସାତପଡ଼ା ଏବଂ ମାଆ କାଳିଜାଇ ମନ୍ଦିରର ସମନ୍ୱିତ ବିକାଶ ପାଇଁ ରାଜ୍ୟ ସରକାର ଏକ ବ୍ୟାପକ ମାଷ୍ଟର ପ୍ଲାନ୍ ପ୍ରସ୍ତୁତ କରିବାକୁ ଯୋଜନା କରିଛନ୍ତି। ପର୍ଯ୍ୟଟନର ଉନ୍ନତି ସହିତ ଚିଲିକାର ସମ୍ବେଦନଶୀଳ ପରିବେଶ ଓ ଜୈବ ବିବିଧତାର ସୁରକ୍ଷାକୁ ସମାନ ଗୁରୁତ୍ୱ ଦେଇ ଏହି ଯୋଜନା ପ୍ରସ୍ତୁତ କରାଯିବ।
ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡା ଏବଂ ଆଇନ, ପୂର୍ତ୍ତ ଓ ଅବକାରୀ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନଙ୍କ ଅଧ୍ୟକ୍ଷତାରେ ଆୟୋଜିତ ଏକ ଉଚ୍ଚସ୍ତରୀୟ ସମୀକ୍ଷା ବୈଠକରେ ଏହି ପ୍ରସ୍ତାବ ଉପରେ ବିସ୍ତୃତ ଆଲୋଚନା ହୋଇଥିଲା। ବୈଠକରେ ଚିଲିକାକୁ ବିଶ୍ୱସ୍ତରର ଏକ ଆଦର୍ଶ ଇକୋ-ଟୁରିଜମ ଗନ୍ତବ୍ୟସ୍ଥଳରେ ପରିଣତ କରିବା ସହ ପର୍ଯ୍ୟଟକଙ୍କ ପାଇଁ ଆଧୁନିକ ସୁବିଧା ସୃଷ୍ଟି କରିବା ଉପରେ ଗୁରୁତ୍ୱ ଦିଆଯାଇଥିଲା।
ବୈଠକରେ ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡା କହିଥିଲେ ଯେ, ଚିଲିକା ଓ ଏହାର ଆଖପାଖ ଅଞ୍ଚଳରେ ବିଶ୍ୱମାନର ପର୍ଯ୍ୟଟନ ଭିତ୍ତିଭୂମି ଗଢ଼ି ତୋଳିବା ସହ ଉନ୍ନତ ଆତିଥ୍ୟ ସୁବିଧା ସୃଷ୍ଟି କରାଯିବ। ତେବେ କୌଣସି ପ୍ରକଳ୍ପ ଚିଲିକାର ପରିବେଶ ଓ ପ୍ରାକୃତିକ ସନ୍ତୁଳନକୁ କ୍ଷତି ପହଞ୍ଚାଇବା ଉଚିତ୍ ନୁହେଁ। ସେ ମାଆ କାଳିଜାଇ ମନ୍ଦିରର ସାମଗ୍ରିକ ବିକାଶ ଏବଂ ଧାର୍ମିକ ପର୍ଯ୍ୟଟନକୁ ଅଧିକ ସୁଦୃଢ଼ କରିବା ଉପରେ ମଧ୍ୟ ଜୋର ଦେଇଥିଲେ।
ଅନ୍ୟପକ୍ଷରେ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ କହିଥିଲେ ଯେ, ଏହି ଅଞ୍ଚଳର ସର୍ବାଙ୍ଗୀଣ ବିକାଶ ପାଇଁ ଏକ ସୁଦୃଢ଼ ଏବଂ ଦୀର୍ଘମିଆଦି ବ୍ଲୁପ୍ରିଣ୍ଟ ପ୍ରସ୍ତୁତ କରାଯିବ। ବିଶେଷକରି ସଡ଼କ ସଂଯୋଗ, ସାଧାରଣ ଭିତ୍ତିଭୂମି ଓ ପର୍ଯ୍ୟଟନ ସୁବିଧାକୁ ଉନ୍ନତ କରିବା ସହ ପରିବେଶ ଅନୁକୂଳ ପ୍ରକଳ୍ପ ଉପରେ ଗୁରୁତ୍ୱ ଦିଆଯିବ। ଚିଲିକାର ଅନନ୍ୟ ଜୈବ ବିବିଧତାକୁ ସୁରକ୍ଷିତ ରଖି ବିକାଶ କାର୍ଯ୍ୟ କରିବା ସରକାରଙ୍କ ପ୍ରାଥମିକତା ବୋଲି ସେ ସ୍ପଷ୍ଟ କରିଥିଲେ।
ବୈଠକରେ ବିଭିନ୍ନ ବିଭାଗ ପକ୍ଷରୁ ପ୍ରସ୍ତାବିତ ମାଷ୍ଟର ପ୍ଲାନର ଧାରଣା ଉପସ୍ଥାପନ କରାଯାଇଥିଲା। ଏଥିରେ ଉନ୍ନତ ସଡ଼କ ନେଟୱର୍କ, ବିଶାଳ ପାର୍କିଂ ସୁବିଧା, ପକ୍ଷୀ ଦେଖିବା ପାଇଁ ବିଶେଷ ଭ୍ୟୁ ପଏଣ୍ଟ, ସାଇକ୍ଲିଂ ଟ୍ରାକ୍, ରୋଲର ସ୍କେଟିଂ ଜୋନ୍, ଜଳକ୍ରୀଡ଼ା ଓ ବୋଟିଂ ସୁବିଧା, ଟ୍ରେକିଂ ରୁଟ୍, ଟ୍ରି ହାଉସ୍, ଓପେନ୍ ଫୁଡ୍ କୋର୍ଟ, ପିକନିକ୍ ସ୍ପଟ୍ ଏବଂ ଓଡ଼ିଶାର ସମୃଦ୍ଧ ସଂସ୍କୃତିକୁ ପ୍ରତିଫଳିତ କରୁଥିବା ସାର୍ବଜନୀନ କଳାକୃତି ସ୍ଥାପନ ଭଳି ପ୍ରସ୍ତାବ ସାମିଲ ରହିଛି।
ଏହା ସହ ଗୋପାଳପୁର-ବାହୁଦା ମଧ୍ୟରେ ପ୍ରସ୍ତାବିତ ଗ୍ରୀନଫିଲ୍ଡ ସଡ଼କ ପ୍ରକଳ୍ପର ମଧ୍ୟ ସମୀକ୍ଷା କରାଯାଇଥିଲା। ଏହି ସଡ଼କ ନିର୍ମାଣ ହେଲେ ଅଞ୍ଚଳର ସଡ଼କ ସଂଯୋଗ ବୃଦ୍ଧି ପାଇବା ସହ ପର୍ଯ୍ୟଟନ ଏବଂ ସ୍ଥାନୀୟ ଅର୍ଥନୀତିକୁ ମଧ୍ୟ ନୂତନ ଗତି ମିଳିବ ବୋଲି ଆଶା କରାଯାଉଛି।
ଚିଲିକା ହ୍ରଦ ଏସିଆର ସର୍ବବୃହତ ଲବଣାକ୍ତ ଜଳ ହ୍ରଦ ହେବା ସହ ଏହା ଏକ ରାମସାର ସ୍ଥଳ ଭାବେ ଆନ୍ତର୍ଜାତିକ ସ୍ୱୀକୃତି ପାଇଛି। ପ୍ରତିବର୍ଷ ଲକ୍ଷାଧିକ ଦେଶୀ-ବିଦେଶୀ ପର୍ଯ୍ୟଟକ ଏଠାକୁ ଆସୁଥିବାବେଳେ ସରକାରଙ୍କ ଏହି ସମନ୍ୱିତ ବିକାଶ ଯୋଜନା ପର୍ଯ୍ୟଟନ କ୍ଷେତ୍ରକୁ ନୂଆ ଦିଗ ଦେବା ସହ ପରିବେଶ ସୁରକ୍ଷା ଓ ସ୍ଥାନୀୟ ଜୀବିକାକୁ ମଧ୍ୟ ସୁଦୃଢ଼ କରିବ ବୋଲି ଆଶା କରାଯାଉଛି।
