ଭୁବନେଶ୍ୱର, ୨୯ ଜୁଲାଇ; ସ୍ୱାମୀ ଲକ୍ଷ୍ମଣାନନ୍ଦ ସରସ୍ୱତୀଙ୍କ ୨୦୦୮ ମସିହାର ହତ୍ୟାକାଣ୍ଡ ଏବଂ ପରବର୍ତ୍ତୀ କନ୍ଧମାଳ ହିଂସା ସମ୍ପର୍କରେ ଗଠିତ ନ୍ୟାୟମୂର୍ତ୍ତି ଏ.ଏସ୍. ନାଇଡୁ କମିଶନଙ୍କ ରିପୋର୍ଟ ନିଖୋଜ ହେବା ଘଟଣାର ତଦନ୍ତକୁ ଓଡ଼ିଶା ସରକାର କ୍ରାଇମ୍ବ୍ରାଞ୍ଚକୁ ହସ୍ତାନ୍ତର କରିଛନ୍ତି। ଏହି ମାମଲା ପୂର୍ବରୁ ଭୁବନେଶ୍ୱର କ୍ୟାପିଟାଲ୍ ଥାନାରେ ରୁଜୁ ହୋଇଥିଲା। ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ନିର୍ଦ୍ଦେଶ ପରେ ସିଆଇଡି–କ୍ରାଇମ୍ବ୍ରାଞ୍ଚ ମାମଲାକୁ ପୁନଃ ରେଜିଷ୍ଟର କରି ଆନୁଷ୍ଠାନିକ ତଦନ୍ତ ଆରମ୍ଭ କରିଛି।
କ୍ରାଇମ୍ବ୍ରାଞ୍ଚ ପକ୍ଷରୁ ଜାରି ସୂଚନା ଅନୁଯାୟୀ, ଡିଏସ୍ପି ଆଶୁତୋଷ ମିଶ୍ରଙ୍କୁ ଏହି ସମ୍ବେଦନଶୀଳ ମାମଲାର ତଦନ୍ତ ଦାୟିତ୍ୱ ଦିଆଯାଇଛି। ତଦନ୍ତ କାର୍ଯ୍ୟର ତଦାରଖ କରିବେ ସିଆଇଡି–କ୍ରାଇମ୍ବ୍ରାଞ୍ଚର ଏସ୍ପି ଅନିରୁଦ୍ଧ ରାଉତରାୟ। ଡିଜିପିଙ୍କ ନିର୍ଦ୍ଦେଶ କ୍ରମେ ଭାରତୀୟ ନ୍ୟାୟ ସଂହିତା (BNS)ର ଚୋରି, ଆପରାଧିକ ବିଶ୍ୱାସଭଙ୍ଗ, ପ୍ରମାଣ ନଷ୍ଟ, ଦଲିଲ ଲୁଚାଇବା ଏବଂ ଅପରାଧିକ ଷଡ଼ଯନ୍ତ୍ର ଭଳି ବିଭିନ୍ନ ଧାରାରେ ମାମଲା ରୁଜୁ କରାଯାଇଛି।
ସରକାରୀ ସୂଚନା ଅନୁସାରେ, ନାଇଡୁ କମିଶନ ରିପୋର୍ଟ ସରକାରୀ ରେକର୍ଡରୁ ନିଖୋଜ ଥିବା ଜଣାପଡ଼ିବା ପରେ ଗୃହ ବିଭାଗ ପକ୍ଷରୁ ଏଫ୍ଆଇଆର୍ ଦାଖଲ କରାଯାଇଥିଲା। ପ୍ରାଥମିକ ତଦନ୍ତ ପରେ ମାମଲାର ଗୁରୁତ୍ୱ ଓ ଜନସ୍ୱାର୍ଥକୁ ଦୃଷ୍ଟିରେ ରଖି କ୍ରାଇମ୍ବ୍ରାଞ୍ଚ ତଦନ୍ତର ନିଷ୍ପତ୍ତି ନିଆଯାଇଛି। ତଦନ୍ତକାରୀ ଦଳ ରିପୋର୍ଟ କେମିତି ନିଖୋଜ ହେଲା, କିଏ ଏଥିପାଇଁ ଦାୟୀ ଏବଂ କୌଣସି ଷଡ଼ଯନ୍ତ୍ର କିମ୍ବା ଅବହେଳା ରହିଛି କି ନାହିଁ, ସେସବୁ ଦିଗରେ ତଦନ୍ତ କରିବେ।
ଏହି ରିପୋର୍ଟ ୨୦୦୮ରେ ସ୍ୱାମୀ ଲକ୍ଷ୍ମଣାନନ୍ଦ ସରସ୍ୱତୀଙ୍କ ହତ୍ୟାକାଣ୍ଡ ଓ ପରବର୍ତ୍ତୀ କନ୍ଧମାଳ ହିଂସାର ପରିସ୍ଥିତି ଅନୁଧ୍ୟାନ ପାଇଁ ଗଠିତ ଏକକ କମିଶନ ଦ୍ୱାରା ପ୍ରସ୍ତୁତ ହୋଇଥିଲା। ନିଖୋଜ ରିପୋର୍ଟକୁ ନେଇ ରାଜ୍ୟରେ ରାଜନୈତିକ ତର୍କ ଜୋର ଧରିଥିବାବେଳେ ତଦନ୍ତରୁ ସତ୍ୟ ସାମ୍ନାକୁ ଆସିବ ବୋଲି ସରକାର କହିଛନ୍ତି।
